Base sa pagbanabana sa Cebu City Disaster Risk Reduction and Management Office head, retired General Anderson Comar nga moabot ngadto sa 1.4 milyunes ka mga deboto ang miapil sa Solemn Procession nga gisugdan sa ala 1:00 sa hapon, Sabado, Enero 18, 2025.
Si Police Lieutenant Colonel Jomar Medil, hepe sa Traffic Enforcement Unit, Cebu City Police Office nagkanayon nga sa labing unang higayon sayo naabot sa Basilica Minore del Santo Niño sa mga alas 3:30 sa hapon nabalik ang mga caroza nga gikargahan sa Sagrada Familia nga gisundan sa bisperas nga misa sa alas 5:30 sa hapon.
Matod ni Medil nga ilang gipatuman ang estriktong lagda nga kung kinsa lang ang apil sa procession mao ra ang mosunod ug wala sila motugot nga dunay mo-insert nga mga deboto.
Sa ilang gipatuman nga security adunay tulo ka layer diin ang una mao ang mga estudyante sa lainlaing tunghaan nga nag-cordon sa rota, ikaduha ang Task Group Cebu nga gilangkuban sa Armed Forces ug Navy samtang ang ikatulong layer mao ang mga polis. / AYB / Hulagway ni Juan Carlo De Vela
